Pedro Sanchez coma Salvini: bloquèja lo vaissèl de l'ONG catalana Open Arms


Lo director de l'ONG catalana Open Arms, Oscar Camps, a assegurat uèi que "detlos arguments administratius del govèrn espanhòl per bloquejar lo vaissèl de OpenArms al Pòrt de Barcelona an pas cap de validitat". De mai, a destacat qu'amb aquel arrèst lo govèrn espanhòl a fach lo meteis que fa lo fascista Salvini, lo ministre d'interior italian. 

"Sembla èsser que sèm pas gaire agradiues per la situacion politica que viu lo país a l'ora d'ara, doncas qu'an fach tota mena de peripecias administrativas per ensajar parar lo vaissèl e per empedir que tornam dins la zòna de rescat ont morisson de personas cada jorn", a explicat Camps dins lo programa de ràdio Aicí, amb Josep Cuní.

Camps assegura que "se èran jamai prepausats un "arrèst administratiu". "Avèm patit d'inspeccions a Itàlia e Espanha e o aviam resolgut fins ara. dins un mes nos lor cal metre un calendari sus la taula, mas tot fa a pensar que se pòt alongar", a exprimit Camps.

A l'encòp, Camps a volgut remembrar que lo govèrn italian neutralizèt ja un vaissèl de l'ONG Open Arms per la via administrativa e qu'es pas mai operatiu, e qu'an cada còp mens de vaissèls per agir dins las zònas de rescat.

La direccion generala de Marina Mercant, que depend del govèrn espanhòl de Pedro Sanchez, a denegat lo permís de sortida de Barcelona del vaissèl de l'ONG Open Arms per navegar fins a aigas internacionalas prèpas a Libia davant lo barrament dels pòrts d’Itàlia e Malta. L’ONG, que rescata los refugiats que se tròban en perilh en nauta mar, a ja presentat recors contra la decision.

L’òrdre emesa lo 8 de genièr sosten que lo vaissèl navègue pendent jorns per portar de personas fòrça luènh del luòc ont son estats rescatadas e sosten qu'aiçò s’escarta de la nòrma internacionala. Lo govèrn espanhòl bloquèja la sortida del vaissèl fins que se garantisca pas l'arribada del vaissèl a Malta e Itàlia.