Occitània, Catalonha e Euròpa | Efrén Beltrán

29a Pujada a la cresta del Salau (Pirenèus), una amassada de catalans e occitans, organizada pel CAOC.


Efrén Beltrán | Director d’InfOccitània | efren@infoccitania.com

Lo 28 de novembre de 2018 finalisèt lo Cicle de dichas nomenat Occitània, Catalonha e Euròpa al sèti dels Amics de l’Unesco de Barcelona. Se tractèron tematicas plan divèrsas, en partir de la sociolingüistica e las politicas lingüisticas actualas en passar per las migracions e la bigàmia practicada per d’òmes occitans en se maridar dos còps, en segond maridatge amb de catalanas al s. XVII, fins a la polemica reconquesta de Castelha organizada per la noblesa catalana.

Lo darrièr jorn del Cicle s'oferiguèt una dicha sus l'istòria dels 40 ans del CAOC. Se tractèt lo percors de l’associacion occitanista de referéncia en Catalonha dempuèi sa debuta amb lo rescontre de l’Enric Garriga Trullols amb personalitats nombrosas del mond de la cultura e de la politica catalana e occitana.

Se faguèt, doncas, referéncia als moments bèls mas tanben a las accions e iniciativas que son estadas abandonadas. Se remarquèt qualas son estadas las dificultats del CAOC darrièrament dins d’un contexte plan marrit ont la lenga d’òc pèrd cada còp de locutors de lenga mairala. En mai d’aquò, França refusa totjorn ratificar la Carta Europèa de las lengas minoritàrias del Conselh d'Euròpa. Aquelas circonstàncias mena a afebliment de l’occitanisme, çò qu’a menat a de consequéncias marridas coma es estat la desaparicion de la seccion occitana (del latz francés) del CAOC al 2015. 

Entre los sieus onorables presidents del de l’autre costat dels Pirineus, lo Cercle d’afrairament occitanocatalan comptèt amb Robèrt Lafont, una personalitat politica e academica màger de l’occitanisme de la segonda meitat del sègle passat.

Lo CAOC es clau en la promocion de l’occitan en Catalonha en oferir de corses de lenga als sieus sòcis. A despart del CAOC, sonque la Universitat de Lhèida e l’Escòla d’Idiòmas Modèrnas de Barcelona oferisson un ensenhament de la lenga e de la literatura occitanas. Lo CAOC oferís cada an de passejadas e de viatges culturals, coma la montada al Pòrt de Salau al Palhars Sobirà a la debuta d’agost ont de catalans e occitans se retròban aval per partejar e, a l'encòp, reivindicar los nèxes istorics e actuals de las doas nacions.

A la fin de la dicha, s'ofriguèt un concèrt del grop “Mirabel” e un aperitiu per metre fin al Cicle. Aquelas dichas sus Occitània e Catalonha s'organizèt amb un esperit dobèrt a las lengas e culturas vernacularas d’Euròpa dins d’un contexte de crisi amb la montada de l’extrèma drecha de pertot en Euròpa.

Grandmercejam Rosa Maria e Jòrdi Salat per l'organizacion d'aquelas dichas sus Occitània, Catalonha e Euròpa. Esperam lèu l'organizacion de dichas nòvas, aqueste còp sus l'ensenhament de l'occitan e la catalan al sègle XXI.