Lo govèrn catalan a l'exili demandarà que se suspene Espanha a l'UE


Lo govèrn de Catalonha a l'exili a presentat aquela dimenjada a Brusselles lo 'Conselh per la Republica Catalana', que serà liderat pel president de la Republica Catalana, Carles Puigdemont. Coma primièra accion internacionala d'aquel organisme, s'impulsarà una iniciativa ciutadana europèa per activar l'article 7 del Tractat de l'Union, que prevei que los estats que compliscan pas los requisits qu'impausa aquela nòrma demòren suspenudi dels sieus dreches.

L’article 7 del Tractat de l'Union velha per que totes los païses de l'UE lor calga respectar las valors comunas de l'Union, compresa l’estat de drech. L'article se pòt exigir se se detecta un cas de risc de violacion grèu o de violacion grèu e persistenta de las valors detalhadas en l’article segond del Tractat de l'UE.

Pels membres del govèrn de Catalonha, tant los qu'opèran a Catalonha coma los que se veson obligats a demorar l'exili o dins la preson, uèi Espanha complís pas los requisits de l'Union Europèa. O a avertit lo ministre catalan a l'exili, Toni Comín, qui a anonciat l'iniciativa en l'acte de presentacion del Conselh per la Republica.

La sancion que demanda activar lo Conselh per la Republica de Catalonha prevei suspéner l'estat afectat dels dreches que se deriven de l’aplicacion dels tractats, comprés lo drech de vòt de l'estat al Conselh Europèu.

Lo ministre Comín a expausat aquela iniciativa quand a explicat que lo Conselh se dividirà en desparièrs domenis d'accion: lo politic, que prepararà lo marc legislatiu catalan, l'internacional, qu'impulsarà la reconeissença a l'exteriora de la Republica Catalana proclamada dins lo Parlament de Catalonha, e en lo domeni dels estudis e la comunicacion.